రామ్ గోపాల్ వర్మకు ‘దిశ’ నిందితుడి తల్లి వార్నింగ్

57

గతేడాది దేశవ్యాప్తంగా సంచలనం రేపిన ‘దిశ’ ఘటనపై దర్శకుడు రామ్ గోపాల్ వర్మ సినిమా తీస్తున్న సంగతి తెలిసిందే. ఈ సినిమా ప్రీ ప్రొడక్షన్ పనులు మొదలయ్యాయి. దిశ ఘటన గురించి తెలుసుకునేందుకు ఇటీవల వర్మ శంషాబాద్ ఏసీపీని కూడా కలిసారు. అయితే ఈ సినిమా తీస్తే ఊరుకోమని దిశ నిందితుల్లో ఒకరి తల్లి మీడియా ముందు వర్మను హెచ్చరించారు. ఇంటిని పోషిస్తున్న తన కుమారుడినే చంపేసినప్పుడు ఇక సినిమా తీసి ఏం లాభం అని అడుగుతున్నారు.

‘‘నా కొడుకు పోయాక మా బతుకులు దారుణంగా మారిపోయాయి. ఆరోగ్యం లేదు, తినడానికి తిండి లేదు. మేము ఎలా బతకాలి? నా బిడ్డను ఎవరు చూస్తారు? మాకు ఏదో ఒక దారి చూపించండి. నా బిడ్డ పోయాక వర్మ సినిమా తీయడం ఏంది? బిడ్డ పోయాక సినిమాతో ఏం చేసుకుంటాం. సినిమా తీయడానికి మేం ఒప్పుకోం. ఒకవేళ తీయాలని ప్రయత్నించినా ఒప్పుకోం. మాకు ఏమీ తెలీదు. నా కూతురికి పెళ్లి ఎలా అవుతుంది? భవిష్యత్తులో ఏం చేయాలో కూడా తెలీదు. నా బిడ్డ పోయినందుకు బాధ ఉండదా? కాయకష్టం చేసుకుని వాడిని పెంచాను. వాడి భార్య అనాథ అయిపోయింది. పాపం చిన్న వయసులోనే భర్తను పోగొట్టుకుంది. ఇప్పుడు ఆమె పరిస్థితి ఏం కావాలి. మీరే దయచూపి కాస్త ప్రభుత్వం నుంచి మాకు ఏదన్నా సాయం చేసేలా చూడండి’’ అంటూ కన్నీరుపెట్టుకున్నారు.

మరోపక్క రామ్ గోపాల్ వర్మ ఇటీవల నిందితుల్లో ఒకరైన చెన్నకేశవులు భార్యను పిలిచి అన్ని వివరాలు తెలుసుకున్న సంగతి తెలిసిందే. ఆమెకు ఆర్థికంగానూ సాయం చేసారు. అయితే ‘దిశ’పై సినిమా తీస్తున్న నేపథ్యంలో వర్మ దిశ తల్లిదండ్రులతో కూడా మాట్లాడలేదు. ఇదే విషయం మీడియా అడిగితే సినిమాపై ఎవరి అనుమతి తీసుకోవాల్సిన అవసరం లేదని సినిమా తీసేందుకు స్వేచ్ఛ ఉందని రామ్ గోపాల్ వర్మ వెల్లడించారు. దేశవ్యాప్తంగా సంచలనం రేపిన ‘దిశ’ ఘటనను ఇప్పటికీ మర్చిపోలేకపోతున్నాం.తెలంగాణకు చెందిన వెటర్నరీ వైద్యురాలిని నలుగురు వ్యక్తులు మద్యం తాగించి దారుణంగా రేప్ చేసి సజీవదహనం చేయడంతో తెలుగు రాష్ట్రాల్లో కలకలం రేపింది. తెలంగాణ పోలీసులు దిశ నిందితులను కాల్చి చంపినా ఇంకా ఆ ఘటన తెలుగు ప్రజల కళ్ల ముందు మెదులుతూనే ఉంది. అందుకే ఈసారి రామ్ గోపాల్ వర్మ ‘దిశ’ ఘటనను తన తర్వాతి సినిమా కాన్సెప్ట్‌గా ఎంచుకున్నారు. ఈ విషయాన్ని వర్మ ట్విటర్ ద్వారా ప్రకటించారు.

Content above bottom navigation