Tuesday, July 27, 2021

మావోయిస్టు నేత మృతి..గతంలో ఉన్న అనుబంధంతో కన్నీరుకార్చిన ఎమ్మెల్యే సీతక్క

Must Read

మావోయిస్ట్ ఉద్యమంలో కొనసాగిన హరిభూషణ్.. భారతక్కలు కరోనాతో చనిపోయారు. వీరి మరణాన్ని మావోయిస్ట్ సభ్యులు గురువారం ధ్రువీకరించారు.ఎన్నో ఎదురుకాల్పుల్లో త్రుటిలో పోలీసుల తుపాకుల నుంచి తప్పించుకున్న వీరు.. కరోనా నుంచి మాత్రం తప్పించుకోలేకపోయారు.

గెరిల్లా యుద్ధతంత్రంలో ఆరితేరిన మావోయిస్ట్ రాష్ట్ర కార్యదర్శి, కేంద్ర కమిటీ సభ్యుడు యాప నారాయణ (50) అలియాస్‌ హరిభూషణ్‌ అలియాస్‌ జగన్‌ కరోనాతో చనిపోయారు. మరో కీలక నాయకురాలు ఇంద్రావతి ఏరియా కమిటీ సభ్యురాలు సిద్దిబోయిన సారక్క అలియాస్‌ భారతక్క కూడా కరోనాతోనే మృతిచెందింది. ఈ విషయాన్ని మావోయిస్టులు గురువారం ధ్రువీకరించారు. వీరు దాదాపు 30 ఏళ్లపాటు మావోయిస్ట్ ఉద్యమంలో పనిచేసారు.

హరిభూషణ్‌ మరణ వార్త తెలుసుకున్న ములుగు ఎమ్మెల్యే, కాంగ్రెస్ నేత సీతక్క ఆయన కుటుంబసభ్యులను పరామర్శించారు. మహబూబాబాద్‌ జిల్లా గంగారం మండలం మడగూడెంలోని ఆయన ఇంటికి వెళ్లారు. ఈ సందర్భంగా హరిభూషణ్ కుటుంబసభ్యులు సీతక్కను పట్టుకుని బోరున విలపించారు. కాగా, మావోయిస్టు నేత హరిభూషణ్‌ మరణంపై ఆమె విచారం వ్యక్తం చేశారు. హరిభూషణ్ మృతి చాలా బాధాకరమైన విషయమని, ఆయన ప్రజల మనిషి అని సీతక్క అన్నారు.

 పాకాల కొత్తగూడ ప్రాంతంలో ఆయన టీం లీడరుగా ఉన్నప్పుడు తానూ ఈ ప్రాంత ప్రజల హక్కుల కోసం ఉద్యమంలో పనిచేశానని ఎమ్మెల్యే సీతక్క గుర్తుచేసుకున్నారు. నక్సలైట్ ఉద్యమంలో దాదాపు రెండు దశాబ్దాలు కొనసాగిన దాసరి అనసూయ అలియాస్ సీతక్క.. ఎన్టీఆర్ పిలుపుతో పోరుబాట వీడారు. అజ్ఞాతం వీడిన సీతక్క ఎల్‌ఎల్‌బీ పూర్తిచేశారు. తర్వాత టీడీపీలో చేరిన ఆమె 2009 ఎన్నికల్లో తొలిసారి విజయం సాధించారు.

ఇక హరిభూషణ్‌ రాడికల్‌ విద్యార్థి సంఘం (ఆర్‌ఎస్‌యూ)లో పనిచేస్తూ 1991లో అటవీ దళంలో చేరారు. 1996లో ఖమ్మం జిల్లా కమిటీ సభ్యునిగా.. 1998లో ఉత్తర తెలంగాణ మొదటి ప్లాటూన్‌ బాధ్యతలు తీసుకున్నారు. 2000లో ప్రొటెక్షన్‌ ప్లాటూన్‌కు బదిలీ అయి 2005లో స్పెషల్‌ జోనల్‌ కమిటీ సభ్యునిగా పదోన్నతి పొందారు. 2015 ప్లీనంలో రాష్ట్ర కమిటీ కార్యదర్శిగా, 2018 నవంబరులో కేంద్ర కమిటీ సభ్యునిగా ఎన్నికయ్యారు. హరిభూషణ్‌ సేవలు పార్టీకి ముఖ్యమని భావించిన కేంద్ర కమిటీ ఆయన్ను ఛత్తీస్‌గఢ్‌కు బదిలీ చేసింది. అక్కడ ఉద్యమకారులందరికీ యుద్ధ పోరాటాలు నేర్పించారు.

Latest News

బ్యాంకులకు 200 కోట్లు మోసం చేసిన వ్యక్తి అరెస్ట్

దేశవ్యాప్తంగా బ్యాంకులకు 200 కోట్లు టోకరా వేసిన ఒరిస్సాకు చెందిన నిందితుడు అరెస్ట్ అయ్యాడు. మైక్రో ఫైనాన్స్‌ పేరుతో వివిధ బ్యాంకులు, నాన్‌ బ్యాంకింగ్‌ ఫైనాన్స్‌...

More Articles Like This