భారత్‌లో రెండో దశకు కరోనా.. ఇప్పుడే నియంత్రించకపోతే కష్టమే డేంజ‌ర్ సైర‌న్

22

ప్ర‌పంచాన్ని ఇప్పుడు ఈ మ‌హ‌మ్మారి వైర‌స్ భ‌య‌భ్రాంతుల‌కి గురి చేస్తోంది.
2019 డిసెంబర్ చివర్లో చైనాలోని వుహాన్‌లో మొదలైన ఈ వైరస్
ఇప్పుడు ప్రపంచంలోని 150 కు పైగా దేశాలకూ పాకింది.
ఈ మహమ్మారి దెబ్బకు ప్రపంచ దేశాలు విలవిల్లాడుతున్నాయి.
దీని బారిన పడుతున్న వారితోపాటు మరణాల సంఖ్య నానాటికీ పెరుగుతుండటం ఆందోళన కలిగిస్తోంది.
ఇంతకూ రెండో దశ ఏంటి..? దాని ప్రభావం ఎలా ఉంటుందో చూద్దాం.

బుధవారం నాటికి ప్రపంచవ్యాప్తంగా 2 లక్షల మందికిపైగా కరోనా బారిన పడగా 8200 మందికిపైగా ప్రాణాలు కోల్పోయారు. ఇటలీలో కరోనా మరణాల సంఖ్య 2500 దాటింది. భారత్‌లో ఇప్పటి వరకూ 151 మంది కరోనా సోకింది. వీరిలో 25 మంది విదేశీయులు ఉన్నారు. కరోనాను కట్టడి చేయడం కేంద్రం, రాష్ట్రాలు తీవ్రంగా శ్రమిస్తున్నాయి. ప్రపంచాన్ని వణికిస్తోన్న కోవిడ్ మహమ్మారి భారత్‌లో రెండో దశకు చేరింది. వైరస్ వ్యాప్తిని అరికట్టడం కోసం భారత ప్రభుత్వం సరైన దిశలోనే పని చేస్తోందని నిపుణులు కితాబు ఇస్తున్నారు.

రెండో ద‌శ ఎలా అనేది చూద్దాం
కోవిడ్-19ను ప్రపంచ ఆరోగ్య సంస్థ గత వారం మహమ్మారిగా ప్రకటించింది. కరోనా రెండో దశ అనేది పరిగణనలోకి తీసుకునే విరామం. ఈ దశలో వ్యాధి ఎక్కడి నుంచి వచ్చిందనేది తెలుసుకోవడం తేలిక. ఉదాహరణకు ఇటలీ నుంచి వచ్చిన వ్యక్తికి కోవిడ్ సోకిందని నిర్ధారణ అయ్యిందనుకోండి.. అది తొలి దశ. ఈ దశలో వ్యాధి వేరే దేశాల నుంచి వచ్చిన వారిలో మాత్రమే కనిపిస్తుంది. తర్వాత అతడితోపాటు అతణ్ని తాకిన, కలిసిన వారికి కూడా సోకుతుంది. ఇది రెండో దశ. ఈ దశలో వ్యాధికి మూలం విదేశాల నుంచి వచ్చిన వ్యక్తి అని తేలిగ్గా గుర్తించొచ్చు. ఎవరి నుంచి ఎవరికి వ్యాధి సోకిందో తెలుసుకోవడం తేలిక.

మూడో దశలో ఇలా..

ఈ దశలో వైరస్ వ్యాప్తిని అడ్డుకోవడం ఎంతో కీలకం. ఎందుకంటే.. ఈ దశ దాటి మూడో దశలోకి అడుగుపెడితే.. పరిణామాలు ఊహించని విధంగా మారిపోతాయి. మూడో దశలో వ్యాధి సమూహ వ్యాప్తి జరుగుతుంది. అంటే ఒకేసారి ఎక్కువ మందికి వ్యాధి సోకుతుంది. కరోనా బాధితుణ్ని కలవకపోయినప్పటికీ.. కరోనా ప్రభావిత దేశానికి వెళ్లని వ్యక్తులకూ కరోనా సోకితే దాన్ని మూడో దశగా పరిగణిస్తారు. ఈ దశలో వ్యాధి సోకిన వ్యక్తికి ఎవరి నుంచి, ఎలా సోకిందనేది తెలుసుకోవడం కష్టం. ప్రస్తుతం ఇటలీ, స్పెయిన్ మూడో దశలో ఉన్నాయి.

నాలుగో దశకు చేరితే..

వ్యాధి ఈ దశ కూడా దాటిందనే పరిస్థితి మరింత విషమిస్తుంది. ఇదో మహమ్మారిలా విజృంభించి, దానికి ముగింపు ఎప్పుడు ఉంటుందో కూడా కచ్చితంగా చెప్పలేం. చైనాలో ఇదే జరిగింది. ఈ దశకు చేరుకుంటే కేసులు వేలు, లక్షలను దాటి కోట్లకు చేరినా ఆశ్చర్యపోవాల్సిన అవసరం లేదు. అదే జరిగితే పేషెంట్లకు చికిత్స అందించడానికి సరిపడా మౌలిక వసతులు మన దగ్గర లేవు. హాస్పిటల్ బెడ్లు, మందులకు కొరత ఏర్పడుతుంది. దేశం మొత్తం కర్ఫ్యూ వాతావరణం నెలకొంటుంది. రవాణా పూర్తిగా స్తంభిస్తుంది. ఇంతటి ఇబ్బందికర పరిస్థితి తలెత్తితే భారీ సంఖ్యలో ప్రాణ నష్టం సంభవించడంతోపాటు.. ఆర్థికంగా కోలుకోలేని ప్రభావం పడుతుంది.

ఐసోలేషన్, క్వారంటైన్ ముఖ్యం

రెండో దశలో వ్యాధికి మూలం ఏంటనేది తెలుస్తుంది కాబట్టి నియంత్రించడం తేలిక. ఇంతకు ముందు మనం చెప్పుకొన్నట్లు.. ఇటలీ నుంచి వచ్చిన వ్యక్తికి కోవిడ్ పాజిటివ్ అని తేలితే.. అతణ్ని క్వారంటైన్లో ఉంచి చికిత్స అందించడంతోపాటు.. అతడి కుటుంబ సభ్యులను, అతడు విదేశాల నుంచి తిరిగొచ్చిన తర్వాత కలిసిన వారందర్నీ 14 రోజులపాటు ఇళ్లలోనే ఉండేలా ముందు జాగ్రత్త చర్యలు తీసుకోవాలి. వారిలో కరోనా లక్షణాలు కనిపిస్తే.. పరీక్షలు జరిపి చికిత్స అందించాలి. ఈ దశలో అదుపు చేస్తేనే కరోనా లాంటి అంటు వ్యాధులు కట్టడి అవుతాయి. లేదంటే పరిస్థితి చేజారిపోతుంది.

భారత్ లాంటి దేశాల్లో కరోనాను అడ్డుకోవడం కోసం రెండో దశలో సెల్ఫ్ క్వారంటైన్, ఐసోలేషన్ అనేవి అత్యంత ముఖ్యమైనవి. ఎందుకంటే ప్రపంచంలోని అత్యధిక జనాభా ఉన్న దేశాల్లో భారత్ ఒకటి. మన దగ్గర జనసాంద్రత కూడా ఎక్కువే. కాబట్టి కరోనా పాజిటివ్ కేసులు నమోదైనప్పుడు సెల్ఫ్ క్వారంటైన్‌లో ఉండటం, జనాల్లో తిరగకపోవడం అనేవి చాలా ముఖ్యం. ఇలా చేయడం వల్ల మిమ్మల్ని మీరు సురక్షితంగా ఉంచుకోవడమే కాదు, వ్యాధిని నియంత్రించడానికి కూడా మీరు దోహదం చేసిన వారవుతారు. కరోనాను రెండో దశలోనే అడ్డుకోగలిగితే పెద్ద ముప్పు తప్పుతుంది. దానికి గడువు కూడా ఎక్కువ లేదు. రెండో దశకు చేరిన నెలరోజుల్లోనే ఈ వ్యాధిని విస్తరించకుండా ఆపాల్సి ఉంటుంది. లేదంటే మూడో దశకు చేరుకునే ప్రమాదం ఉంది.

Content above bottom navigation