7వ నెలలోనే బలవంతపు డెలివరీ.. పుట్టింది మగా, ఆడా తెలియని గాంధీ సిబ్బంది

గాంధీ ఆస్పత్రి వైద్యులు ఎంత నిర్లక్ష్యంగా వ్యవహరిస్తున్నారో తెలిపే మరో ఘటన ఇది. అనారోగ్యంతో గాంధీలో చేరిన ఏడు నెలల గర్భిణీకి వైద్యులు బలవంతపు ప్రసవం చేశారు. అంతేనా..! అసలు ఆ వార్డులో లేని రోగి పేరును ఆమె అర చేతిలో రాసి, రిపోర్టులను తారుమారు చేశారు. ఈ క్రమంలోనే ఎవరికో చేయాల్సిన ప్రసవాన్ని ఈ ఏడు నెలల గర్భిణీకి చేశారు. అంతేకాకుండా, పుట్టింది బాబు అయితే, పాప అని చెప్పి మరో తప్పు చేశారు. చివరికి ఆ పుట్టిన శిశువు చనిపోయిందని సమాచారం ఇచ్చారు. ఇలా తప్పులపై తప్పులు చేశారు. మంగళవారం గాంధీ ఆస్పత్రిలో జరిగిన ఈ పరిణామం గాంధీ ఆస్పత్రిలో వైద్యుల నిర్లక్ష్యానికి పరాకాష్ఠగా నిలిచింది.

మహబూబాబాద్ జిల్లా పెద్దవంగర మండలం, వడ్డె కొత్తపల్లికి చెందిన ఎనగందుల హరీష్ భార్య 24 ఏళ్ల సమత 7 నెలల గర్బిణి. ఆరోగ్యం బాగలేక 11న ఆమెను వరంగల్లోని ప్రైవేటు ఆస్పత్రికి తీసుకెళ్లారు. వైద్యులు గాంధీకి రిఫర్ చేయగా.. 12వ తేదీ తెల్లవారుజామున 4.30 గంటలకు ఇక్కడికి తీసుకొచ్చారు. సమత అత్యవసర పరిస్థితుల్లో ఉందని చెబుతూ భర్త హరీశ్ నుంచి హామీ సంతకం సైతం చేయించుకున్నారు. ఆస్పత్రిలోని బ్లడ్ బ్యాంకులో ఉన్న ఓ పాజిటివ్ రక్తాన్ని కూడా రిజర్వు చేయించారు. ఆ తర్వాత భర్తకు సమతను చూపించలేదు. మళ్లీ ఓ రాత్రి అయితే, రాత్రి వేళ ఫోన్ చేసిన సిబ్బంది శిశువు పుట్టాడని, ఐసీయూకు రావాలని చెప్పారు. అప్పటికీ హరీశ్ను అద్దాల నుంచి మాత్రమే చూడాలని చెప్పారు. ఉన్నట్లుండి తెల్లవారుజామున ఫోన్ చేసి శిశువు పరిస్థితి విషమంగా ఉందని ప్రత్యేక పర్యవేక్షణలో పెట్టామని తెలిపారు. మళ్లీ శిశువు చనిపోయిందని కబురుపెట్టారు.

Image result for hospital

ఇంత పెద్ద తప్పునకు కేస్ షీట్లు మారడమే కారణంగా చెబుతున్నారు. అయితే, ఇది ఆసుపత్రి వర్గాల తీవ్ర నిర్లక్ష్యమే స్పష్టంగా కనిపిస్తోంది. బాధితురాలు సమత అరచేతిలో భవాని అని వార్డులో లేని మరో మహిళ పేరు రాశారు. అబ్బాయి అని ముందు చెప్పి.. తర్వాత చనిపోయింది పాప అని ఎందుకు చెప్పారని ప్రశ్నిస్తే సమాధానమే లేదు. సమత కేస్ షీట్ ట్యాగ్లోనూ శివువు జెండర్ స్థానంలో ‘పాప’ అని రాసి పెన్నుతో కొట్టేసి ‘బాబు’గా అని రాసి ఉంది. శిశువు బరువు కేజీ అని రాసి తర్వాత 900 గ్రాములుగా, సమయం కూడా మార్చారు.

దీంతో బాధితులు పోలీసులకు ఫిర్యాదు చేశారు. ఎస్ఐ రాజశేఖర్ కేసు నమోదు చేసుకుని దర్యాప్తు చేస్తున్నారు. ఈ ఘటనపై నలుగురు వైద్యులతో నిజ నిర్ధారణ కమిటీని ఏర్పాటు చేశామని గాంధీ ఆస్పత్రి సూపరింటెండెంట్ శ్రవణ్ తెలిపారు. బుధవారంలోగా వారు నివేదిక ఇస్తారని తెలిపారు. నిర్లక్ష్యం రుజువైతే కఠిన చర్యలు తీసుకుంటామని చెప్పారు.

Content above bottom navigation