లాక్ డౌన్ 3.0: ప్రజలకు గుడ్ న్యూస్ చెప్పిన ఉప రాష్ట్రపతి

దేశంలో వైరస్ మహమ్మారి వ్యాప్తి చెందుతున్న తరుణంలో మూడో విడత లాక్ డౌన్ పొడగింపు నిర్ణయాన్ని ఉప రాష్ట్రపతి ముప్పవరపు వెంకయ్య నాయుడు స్వాగతించారు. మే 4వ తేదీ నుంచి మరో 2 వారాల పాటు 3వ విడత లాక్ డౌన్ (3.O) ప్రకటించిన నేపథ్యంలో ఆర్థిక కార్యకలాపాలకు వెసులుబాటు కల్పించడం కోవిడ్ -19తో సాగుతున్న సమిష్టిపోరాటంలో ఓ మైలురాయిగా భావిస్తున్నట్లు తెలిపారు.

పూర్తి వివరాలకు ఈ వీడియో చూడండి:

ఈ మేరకు ఉప రాష్ట్రపతి వెంకయ్యనాయుడు శనివారం ఓ ప్రకటన విడుదల చేశారు. కరోనాపై పోరాటంలో ఇప్పటి వరకూ కేంద్ర ప్రభుత్వం ముందంజలో ఉందని, ప్రజల జీవితాలపై దృష్టి సారించి, రాష్ట్ర ప్రభుత్వాలతో సంప్రదించి యుద్ధ వ్యూహాన్ని రూపొందించి చాలా వరకూ విజయం సాధించిందని తెలిపారు. ఈ ప్రయత్నం అందించిన సానుకూల ఫలితాలను సమాజం హర్షిస్తోంన్నారు.

ప్రస్తుతం దేశ వ్యాప్తంగా నెలకొన్న పరిస్థితులకు అనుగుణంగా ఆర్థిక కార్యకలాపాలు పునఃప్రారంభం కానున్నాయని ఉపరాష్ట్రపతి వెంకయ్య నాయుడు తెలిపారు. గ్రీన్ జోన్స్‌లో చాలా భాగం, ఆరెంజ్ జోన్స్‌లో కొంత భాగం ఆవసరమైన ఆర్థిక పునరుజ్జీవనానికి పరిస్థితి ఆశాజనకంగా కనిపిస్తోందన్నారు. ఆర్థిక కార్యకలాపాలు పునఃప్రారంభమవుతున్న ప్రస్తుత తరుణంలో ఆర్థిక వ్యవస్థను స్తంభింపజేసే ఇలాంటి వ్యాధి వ్యాప్తిని అరికట్టడంపై మనం ఎట్టి పరిస్థితుల్లోనూ అలసత్వం వహించకూడదని పిలుపునిచ్చారు. మొదటి, రెండో లాక్ డౌన్ సమయాల్లో తీసుకొచ్చిన గొప్ప మార్పులు, రాబోయే కాలంలో వైరస్ పూర్తిగా అంతమొందే వరకూ అన్ని చోట్ల కొనసాగుతూనే ఉండాలన్నారు.

మాస్క్‌లు ధరించడం, సామాజిక దూరాన్ని పాటించడం, సమావేశాలు నిర్వహించకపోవడం లాంటి వాటి ద్వారా ఇప్పటి వరకు ఎంతో లబ్ధి పొందామని, ఇకపై కూడా ఇదే మార్గంలో పయనించాలన్నారు. ఎందుకంటే కనిపించని ఈ శత్రువు మనం ఆలసత్వం వహిస్తే మళ్ళీ విజృంభించే ప్రమాదం ఉందని హెచ్చరించారు. సమర్థవంతమైన నిర్ణయాల ద్వారా కోవిడ్ -19 వ్యతిరేక పోరాటంలో భారతదేశంలో ముందంజలో ఉందని అభిప్రాయపడ్డారు.

అలాగే కోవిడ్-19కు ఉప రాష్ట్రపతి వెంకయ్యనాయుడు సరికొత్త నిర్వచనం ఇచ్చారు. దీన్ని తాను కోవిడ్ – కామనాలిటి ఆఫ్ విజన్, ఇంటెంట్ అండ్ డిటర్మినేషన్ గా భావిస్తున్నట్లు పేర్కొన్నారు. భిన్నత్వంలో ఏకత్వానికి ప్రతీక అయిన భారతదేశంలో విభిన్న భౌగోళిక, సామాజిక, ఆర్థిక పరిస్థితుల్లో నివసిస్తున్న 130 కోట్ల మంది భారతీయులు అనుసరించిన ఇలాంటి సాధన ప్రపంచాన్ని ఆశ్చర్యపరచిందన్నారు. కేంద్ర, రాష్ట్ర ప్రభుత్వాలు,వైద్యులు, పారా మెడికల్ సిబ్బంది, పోలీసులు, పారిశుద్ధ్య కార్మికులు వంటి ముందు వరుస యోధులతో పాటు రైతులు, ప్రజలు కూడా ప్రశంసలకు అర్హులేనని స్పష్టం చేశారు. కానీ ఈ యుద్ధం ఇక్కడితో ఆగిపోలేదని, సాధించాల్సిన విజయం చాలా ఉందన్నారు.

Content above bottom navigation